爱情的落雨天 作者： 毛豆子 伊来寻我的辰光，我还在为仔一道算术题目伤脑筋。下半日两点钟，外头还是多云天气，微风从窗子里吹进来，十分适意。我有点吃惊地抬起头来看伊，小姑娘穿仔条白裙子，扎着辫子，眼乌珠滴溜溜地转，猜不透在想啥。 “小鬼头做啥？”
爱情的落雨天
作者： 毛豆子
伊来寻我的辰光，我还在为仔一道算术题目伤脑筋。下半日两点钟，外头还是多云天气，微风从窗子里吹进来，十分适意。我有点吃惊地抬起头来看伊，小姑娘穿仔条白裙子，扎着辫子，眼乌珠滴溜溜地转，猜不透在想啥。
“小鬼头做啥？”
“侬再是小鬼头。”伊笑得来前仰后合，“阿拉出去伐？”
“出去做啥？”
“白相啊。”伊狡黠地讲，眼睛眨法眨法。
我也笑了：“侬先帮我拿题目做出来。”
“哎呀，勿要呀。”伊笑着跳脚，“偶是嗲人啦，算术的物事偶是拎伐清爽格宛。”伊的外婆是常州人，而我的籍贯也是常州，所以伊没事体就欢喜跟我讲两句常州闲话。我对伊做了个怪腔。
“做仔嘎长辰光，伐白相要戆特的呀。”伊又软软地求着，小姑娘发嗲一只鼎。我笑着刮了刮伊的鼻头：“好老好老，吃伲伐消。”我晓得我的心思也老早仔被伊带了跑了。
离开学堂里那种沉闷的，让人来瞌匆的气氛，原来人的心情也马上会得好交关的。立夏刚过，马路两边的法国梧桐已经绿意盎然。虽然是黄梅天气，空气湿答答的，但是也可以算一个勿错的日脚了伐。我笑嘻嘻地讲：“阿拉到阿里去好呢，细丫头？”伊在伊拉屋里是最小的，伊姆妈总归用常州闲话“细丫头，细丫头”地叫，结果被我听得来，咬牢仔不放了。
伊讲：“我也勿晓得，阿拉就随便荡荡马路好了。”
大概是交关辰光没出来白相了，伊开心得像只小鸟，连走路也要跳法跳法了。马路上人蛮多的，我捏牢仔伊的手，生怕伊走没特。伊的手小小巧巧，讲勿出的适意，拿我的心也漾掉了。阿拉转过街角，伊眼睛尖尖一记头就发觉了对过的冷饮店，于是拉牢我跑过去，自说自话地从雪柜里拿出仔两根脆皮雪糕往我手里一塞，然后鸦到我的背后，吃吃地坏笑：
“是侬买的。”
“做嗲啦，痴头怪脑。”我嗔笑着想用雪糕敲伊的脑壳，伊却逃得远开八只脚去。我付了钞票，拿伊捉回来，伊于是抿牢嘴巴，装了老乖老乖的样子。我望了伊一歇，终于自家熬不牢先笑出来，只好塞畀伊一根雪糕，伊笑得来立也立勿直。
我讲：“侬嘎惹气，将来没人要侬了。”
伊马上跑过来拉牢仔我：“勿搭界的，我跟牢侬好来。”
天一点点开始闷起来，阿拉荡仔几条马路，就孵进商场的空调间勿出去了。我跟牢仔伊从U2跑到chanel，从Elle转到Christian Dior，心里吓老老，别过还好伊也就看中仔一只大路的皮夹子。
商场五楼的咖啡店环境勿错，玻璃上亮，看外头邪气清爽。阿拉就坐了窗口头，要了两杯咖啡。本来我最欢喜浓的黑咖啡，但是伊只欢喜加仔交关牛奶的cappuccino，所以我也就陪伊吃cappu了。伊用调羹调了一调，就来煞不及地啜了一口，结果急吼吼的，弄得嘴唇上都是咖啡，样子邪气可爱。我望牢仔伊，心底一面好笑，一面又讲勿出的欢喜。
也勿晓得过了多少辰光，伊突然跟我讲：“快点看：外头要落雨了。”
我往窗子外头瞄了一眼，果然，天高头的乌云已经低得勿好再低，天色昏昏沉沉，感觉到空气的闷湿也到了极点。
我笑了：“落雨喽，打烊喽。”
伊也笑了：“小八腊子开会喽。”
伊突然又兴奋起来，拉牢仔我的手讲：“阿拉出去淋淋雨好伐？”我碍了一碍，失笑的讲：“侬花样经那能嘎透的啦？”伊嘴巴嘟嘟，硬劲要出去，我拗勿过伊，只好应承下来。伊开心地笑了一歇，后头想起来啥，一本正经地问：“我是勿是老‘作'的啊？”我哭笑勿得，学仔伊姆妈的腔调讲：“细丫头，闹到哉。”伊格格地笑了讲：“好哇，侬格死人，我下趟作天作地作畀侬看看交。”
外头真的落雨了。阿拉刚刚走到马路上的辰光，还只不过是一点点雨丝。后头是一笃笃雨水，最后就淅沥淅沥落起来了。伊伸出手，摊开仔手掌，让手心被“滴滴答答”地一点点打湿。雨慢慢交大起来，打仔在树叶子上噼哩啪啦地响，落仔在商店的橱窗上划出一条条水迹，马路上开始有斑斑点点，越来越多，最后湿透了，就统统变仔了深颜色。
伊讲：“侬闻到伐？落雨的辰光空气里头有一种香味道。”
我笑了笑，没讲闲话。伊伸过手来拉牢我，我也拉牢伊。
雨越来越大，马路上的人都撑起了伞，要么就鸦进路边的商店里去了。只有阿拉两家手搀牢手，在雨里慢慢交地散步。雨中的城市看出去有另外一种味道，颜色好像比老早新鲜仔一点，本来灰蒙蒙的房子，暗擦擦的广告，在落雨的辰光好像也有了一种活力。法国梧桐的叶子，看起来更加是水汪汪地绿，让人觉着生命充满希望。
伊停下来，拿辫子解开来，再拿湿头发撸到了耳朵后头。我看牢伊笑，伊也对我笑笑，伊的眼神突然也像水一样的温柔，我勿会看勿懂伊眼睛里的意思。
“侬晓得伐，侬是对我最重要的人。”我讲。
伊点点头：“嗯，侬也一样是的。”
我跑到对过的花店里买了一束玫瑰花送伊，伊的面孔也彤彤红，像煞了玫瑰一样。
虽然湿得来一天世界，我想我还是欢喜上了这个落雨天。这个有过雪糕，商店，咖啡，玫瑰跟伊的落雨天。虽然人家讲，随便啥事体在心里也藏勿牢多少辰光，总归要忘记得清清爽爽的，但是我想勿管那能，只要我还记得伊，我就应该记得这个落雨天，记得这段开心跟痴颠的日脚，记得阿拉一道走过来的样子。
所以一到落雨的辰光，我还是欢喜去咖啡店，泡一杯咖啡看看外头的风景。虽然我的对过已经勿会再有伊，也勿会再有人跟我搀牢手，开开心心地去做两只落汤鸡。 （本文是吴语试验文）
网友评论